We are Proudly South African
Home / Archived / Loki Rothman sing Temalied van Jou Romeo

Loki Rothman sing Temalied van Jou Romeo

Tienerfliek kry Kitaar Klanke in Klankbaan

Loki Rothman sing die Temalied van Jou Romeo

Loki Rothman

Die veelsydige kitaarmeester, LOKI ROTHMAN, se talent ken geen perke nie. Hy het reeds die meeste genres op die kitaar bemeester, het ’n meesleurende stem, verf asemrowende landskappe met sy oorspronklike lirieke en is ook ’n uiters suksesvolle musiekvervaardiger.

Loki is ook verantwoordelik vir die klankbaan van die nuutste romantiese tienerkomedie, JOU ROMEO, en die treffer, Ons op ons eie, wat gedurende die week van 17 Oktober 2016 aan radiostasies regoor die land vrygestel is. Hierdie liedjie is ook beskikbaar op Afrikaans is Groot Vol. 9 wat tans op die rak is!

Die lied se lirieke, asook die kreatiewe vermenging van elektroniese dansmusiek-, akoestiese en pop-elemente beskryf ’n toneel in die fliek waar ’n liefdesteleurstelling plaasvind. Die vervaardiger van Jou Romeo, Dries Scholtz vertel:  “Ek volg al lank vir Loki op YouTube, maar ek kon hom net nog nooit ontmoet nie, al was ons in dieselfde hoërskool! Uit die bloute kontak Loki my toe op Facebook en noem dat hy baie graag betrokke wil raak by films.

Dit was vir ons ’n maklike besluit om daar en dan  Jou Romeo saam met hom aan te pak! Dit is die eerste keer wat ons in een van ons films al ons klankbaanmusiek spesiaal vir die film laat vervaardig het. Loki is ’n ongelooflike talent en ons sien uit na die volgende film saam met hom!”

Loki is op sy beurt net so opgewonde: “Dries het my gevra om oorspronklike musiek te vervaardig vir Jou Romeo. Dit was vir my ’n uitdaging om ’n reeks liedjies te skryf deur slegs die visuele materiaal van die fliek as verwysing te gebruik om die inhoud van die liedjies te skryf.  Die laaste liedjie wat ek gesryf het, Ons op ons Eie, was my gunsteling en ek wou dit graag self sing.  Hierdie snit is Loki se eerste oorspronklike Afrikaanse liedjie.

Diaan Lawrence, Dirk Stoltz, Row-Lean, Sarahann Doherty en Carmin Coetzer vertolk ook rolle in Jou Romeo. Die fliek verken interessante temas oor “om te behoort”, ander na waarde te skat en om ongewone kwaliteite in ander te ontdek. Voeg ’n tikkie romanse hierby en sprinkel ’n bietjie liefde oor en hierdie is die perfekte somerfilm om saam met jou vriende en familie te geniet.

Jou Romeo is deur The Film Factory vervaardig en draai vanaf 23 Desember 2016.  Hier is die, soos die engelsman sou sê, die Trailer.

#

Comments are closed.

Scroll To Top