We are Proudly South African
Home / Archived / Music Archives / Lizandra Winter en Joshua na die Reën: Ek Wil Vir Jou

Lizandra Winter en Joshua na die Reën: Ek Wil Vir Jou

Nuwe Musiek Video Bring Winter na die Reën

Daar was lanklaas ‘n verwerking van ‘n ou treffer wat so opreg, suiwer en beeldskoon opgeneem is soos nou met Christa Steyn se liedjie, Ek wil vir jou.  Die uiters talentvolle Lizandra Winter en Joshua na die Reën roer die hartsnare en sorg vir ‘n emosie-belaaide weergawe van hierdie pragtige lied.  Die liedjie wat gedurende Februarie 2018 aan radiostasies landswyd uitgereik is, word nou opgevolg met die musiekvideo en gaan beslis asems wegslaan.

In die musiekvideo is Lizandra en Joshua op twee verskillende plekke, maar dit is duidelik dat hulle op dieselfde grond is.  Hulle sing elkeen vanuit ‘n plek van verlange met die smagting na die ander een se nabyheid en alhoewel hulle nooit vir mekaar kyk nie is daar ‘n gedeelte in die video waar hulle baie naby aan mekaar is en rug teen rug staan.  Hierdie is ‘n metafoor vir hoe dinge soms in ‘n verhouding is.  Naby, maar tog so vêr…

“Soms, veral in die gejaag van ons daaglikse bestaan kyk ons na mekaar sonder om mekaar raak te sien.  Om weerloos voor iemand te wees is nie maklik nie, maar dit is in daardie plek van oorgee waar ons mekaar begin vind en waar lewe kan begin”, sê Lizandra.

Die video is op Gerhard en Nettie de Villiers se Gasteplaas, Erfdeel verfilm en vervaardig deur Jean de Villiers van Daville Films, met addisionele materiaal deur Gustav Reyneke en Japie Kruger.

“Omdat hierdie lied regtig eerlik en rou is van aard en ook ‘n tema van ontbloting aanspreek wou ons graag iets simplisties, dog treffend uitbeeld met hierdie musiekvideo.  Ek hoop dat die video in sy eenvoud ‘n groot impak op mense se harte sal hê”. Sê Lizandra.

 

Ek wil vir jou is ook beskikbaar op Lizandra Winter se debuutalbum en op iTunes

#

Comments are closed.

Scroll To Top